Tuesday, April 24, 2007

????????????????????????????????


اين هو ..كان يوجد هنا ..اين هو .. لا اجده
..اممممممم
عما ابحث ؟!
انا لا اعلم
لكنى اشعر.. اشعر.. ان شىء ما مفقود
شىء كان موجود.. استشعر هذا الفراغ
احاول البحث ثانية

- لم تجدى شيئا اليس كذلك؟ هذا يعنى ان لاشىء مفقود
واذا كان هناك فعلا شىء مفقود ولم تستطيعى ان تتوصلى اليه الان هذا يعنى انك لم تشعرى انه فى يوم من الايام كان موجود

لا..لا .. انت لا تفهمينى
اشعر ان شىء ما مفقوووود

Tuesday, April 17, 2007

عندما يتاّمر الكون

عندما يتاّمر الكون كله لعدم تحقيق احلامك

عندها
..........................................................................................................
...........................................................................................................
.........................................................................................................
........................................................................................................
.........................................................................................................
...........................................................................................................
............................................................................................................
.............................................................................................................
...............................................................................................
............................................................................
.............................................
.........................
...............
.......
....
..
.

Monday, April 09, 2007

انا زعلانه اوى ..بس مش هابقى ضعيفه و مافيش دمعه حزن تانى


دخلت على سريرى على طول ومش رضيت اقعد اتعشى معاهم عشان ما حدش يلاحظ الدموع اللى فى عنيا
سريرى اخدنى فى حضنه قعدت اعيط كتير بس لحظه اخدت القرار
انى مش هاعيط تانى .. اصلا ما فيش اى حاجه فى الدنيا تستاهل اعيط ليه ؟وانام زعلانه ليه ؟..دلوقتى اقوم اشتغل افيد
مسحت دموعى و قمت فتحت الكمبيوتر ..قعدت قدامه دلوقتى
حاولت اشتغل .. بس مش قادرة .. ومش قادرة اكابر اكتر من كده .. انا ضعيفه اوى مش قويه ولا حاجه .. انا بردانه اوى .. وخايفه اوى..

محتاجه حد يحضنى اوى دلوقتى ويطمنى

نفسى اجرى على بابا وماما وانام وسطهم زى زمان عشان ما احسش انى خايفه
بس عمرى ما هاعمل كده دلوقتى عشان مش اخليهم يقلقوا عليا لانى عارفه انهم هايقلقوا عليا ويزعلو اد ايه لو شافونى فى الحاله دى
وانا اموت نفسى بس بابا وماما مايزعلوش لحظه .. يارب خليهم ليا يارب انا من غيرهم ولا حاجه ..
انا مجرد وجودى معاهم هنا دلوقتى بيطمنى اوى .. بس اللى مخوفنى اوى انى المفروض هابعد عنهم .. انا مش عايزه ابعد عنهم خالص عايزه افضل معاهم هنا يارب اموت قبل اليوم ده يارب يا رب انا مش عايزه اى حاجه تانيه من الدنيا الا انى افضل معاهم بس يارب..
كان نفسى علاء يبقى هنا
عشان اتكلم معاه بس هو مسافر دلوقتى
انا بحبك اوى يا علاء ومفتقداك اوى
وحشنى اوى بجد دخلت المدونه بتاعتك اتونس بكلامك واحس طيبتك حنيتك وشقاوتك والحقيقه كمان طمعا فى ابتسامه اهرب بيها من الحاله دى
واتمنيت تكون دخلت كتبت بوست جديد او رديت على التعليقات
بجد يا علاء محتاجه ليك اوى دلوقتى

فضلت اسمع الاغنيه اللى انت حاطتها ..
عارف تأكدت انك حاسس بيا دلوقتى عارف حسيت الاغنيه اوى خلتنى اعيط اكتر .. لاء خلتنى انهار

اصل نفسى صعبت عليا اوى يا علاء..

.. انا عايزه افضل مع بابا وماما واخواتى انا خايفه اوى ..هل ممكن اصحى فى يوم من غير ما ماما تيجى تصحينى وتقعد تتحايل عليا وتتكلم معايا وتجبلى مج الشاى فى السرير عشان افوق واقدر اصحى ولا احسسها بيا لما اكون مضايقه وحنيتها وتحفيزها وتشجعها ليا ووقفتها جنبى طول الوقت .. هل ممكن استحمل انى وانا سهرانه باليل ملاقيش علاء جاى يتكلم معايا ونفضل ندردش لحد الصبح او يفاجئنى بكوباية عصير او شاى وانا قاعده بشتغل .. ولا الشيتوس والمصاصه اللى ضرورى يشتريهم ليا كل ما يبقى جاى من برة.. ولا حنية ولاء وسؤالها عليا كل دققتين لما اكون تعبانه ولا فرحتى لما بابا يجى من الشغل ونقعد نتفرج مع بعض على التلفزيون ومنقشتنا وفرحتى لما بشوف فخرة بيا والفرحه فى عنيه لما اقول رأى يعجبه ولا لما يفاجئنى بحاجه وهو جاى من الشغل لمجرد معرفته انى كنت عيزاها
و لو فى مرة لقانى زعلانه ممكن يهدلى الكون كله.. ولا كريم واستحمالة لرزالتى عليه ومعاملتى النديه ليه بالعكس هو اللى بياخدنى على قد عقلى بالرغم من انى الكبيرة ولا الهوهوز والبونبونى اللى بيشتريم ليا وهو جاى من الدرس .. ياه اتكلم على ايه ولا ايه .. هما مش بيحبونى لانى بسمع الكلام ولا لانى بعمل اكل كويس ولا لانى.. ولا لانى.. ولا لانى ..
بيحبونى وبس كده من غير مقابل وهما بالنسبه ليا كل عمرى كيانى وجودى من غيرهم عمرى ما هبقى انا ..من غيرهم انا ماليش لزمه من غيرهم انا ماليش وجود اصلا هما الوجود
انا عمرى ما اقدر ابعد عنكم ابدا
انا عايزه افضل معاكوا

بذمتك ابقى عقله لو سيبت الحب ده كله ؟!
اصلا اسيبه واروح فين لحد يعاملنى كأنى جاريه حد ياخدنى من اهلى ويبقى هو كل حياتى واذ فجأة بعد خلاف بسيط اكتشف ان انا مجرد شىء فى حياته مالوش لزمه مجرد ديكور بيكمل حياته لان ضرورى يكون عنده زوجه مطيعه تطبخ وتمسح وتكنس .. وطول ما هى كده وبتقول حاضر هايفضل يقولها بحبك وحورات ولو مش كده او لو اختلفت معاه يختفى الحب اللى كان عمال يحكى فيه -وصدقته الساذجه - ومش بعيد يخيرها بين انها تعمل اللى هو عايزه او يسيبها
انا اللى يحبنى يحبنى من غير شروط يحبنى لاخر لحظه فى عمرة واوبشن انه يبعد عنى ده مايكونش مطروح اساسا حتى لو حصل ايه ومايكنش فى حاجه فى الكون ممكن تخليه يفكر مجرد تفكر انه يبعد عنى
هل ممكن الاقى حد يحبنى فى المطلق كده ؟! او يكون حنين عليا ويخاف عليا بالشكل ده؟!
اعتقد ان الاجابه الوحيده هى
مافيش
عارف يا علاء انا خايفه اوى
وحاسه بالقهر اوى
بس عارف خلاص دلوقتى انا ماسحت دموعى خلاص بجد .. عارف كنت محتاجه افضفض معاك بس (:

و عارف برضه
"خلاص مافيش دمعة حزن عشانه "
انا عارفه انت هاتقولى ايه
بس
تفتكر ممكن حد يسامح حد خلاه يعيط من الساعه 11 لحد الساعه 5 الفجر






Monday, April 02, 2007

احمد العايدى



خرجنا انا وطلال فيصل من الاوبرا كانت وجهتنا مترو الانفاق لانه اقرب شىء ممكن يوصلنى.. سرنا تحادثنا فى كل شىء تقريبا عن احلامنا ومخاوفنا وطموحتنا عن الدنيا وعدم استيعابنا لمنطقها .. كنت بفكر فى كل شىء كنت خائفه من كل شىء وصلنا امام المترو..توقفت للحظات شعرت بهذا الهواء الخانق الذى يتصاعد من داخل تلك الحفرة التى من المفترض ان ادخلها الان ولكنى قررت
" انا مش مستعده انزل تحت الارض دلوقتى "
وسرنا ..الجو مختلف تلك اليلة ..
تلك الاضاءة تشعرك انك تسير فى احدى شوارع مدن الف ليلة وليلة ..افكر للحظات لايمكن ان يكون هذا الجو طبيعى اعتقد انى اعيش تفاصيل حلم لانى استشعر كل لحظه اشعر ان الزمن اصبح اهدى فى سيره كأنه يتنزة على شاطىء المحيط الهادى فى ليلة صيفية .
كان الجو اسطورى بشكل لا يوصف
قلتله الجو حلو اوى النهارده قالى فعلا تحسى فيه بالسكينه .. وجعلنا كل هذا نستغرق اكثر فى الحديث عن احلامنا وطموحاتنا ومخاوفنا .. اتكلمنا فى الحياة وانطباعتنا عن البشر وهانعمل ايه فى الشغل و و و و و و و و و و و
السكون محتوى كل شىء حتى تلك السيارات المتحركه لكن احد تلك السيارت تهدىء من سرعتها واخذت تقف فى سكون ايضا يبدوا انها ستنزل احد راكبيها _ طبيعى جدا _ لكن قبل ان نتجاوز السيارة بخطوه واحده فقط شاهدته يخرج من السيارة وضع قدم ثم الاخرى وخرج من الباب الخلفى للسيارة

صدفه تجنن فرحت اوى بجد وانقضيت عليه حتى قبل ما يسترجع توازنه بعد خروجه من السيارة
احمد العايدى
قابلنى بابتسامته البشوشه وكلمته التى ينطقها
بنغمته الخاصه وبود شديد اول لما يقابل حد
" اهلالالالا"
سلمت عليه انا وطلال .. كان واحشنى جدا كان بقالى كتير اوى مش شفته
اتكلمنا فى كذا حاجه بسرعه وطبعا عمرى ما هنسى انه قالى ان مدونتى حلوه اوى فرحت جدا لما قالى كده قلتله انت شفت مدونتى قالى اه شفتها انتى عامله فيها حاجات حلوه بس ما اكدبش عليكى مش متابع على طول اصلى مشغول شويه
سلمنا عليه وكملنا مشينا اصبح الجو حماسى جدا بينى انا وطلال وقعدنا نتكلم عن الصدفه الجميله دى واتكلمنا عن القدر وان كل شىء مترتب وقعدنا نحسب من اول ما خرجنا من الاوبرا وقفنا قد ايه نتكلم هانعمل ايه فى الشغل ووقفنا كام ثانيه قدام المترو وازاى غيرت رأى فى اخر لحظه انى ما مش اركب المترو وحسبنا مشينا بسرعه كام خطوه وازاى كل خطوه كانت محسوبه لاننا لو كنا سابقين بخطوطين بس مش كنا هانقابل العايدى ولا نشوفه قلتله قد ايه بحب العايدى وهو انسان راااااائع وقالى قد ايه هو كان نفسه يقابله وعن انطباعه الاول عنه كنا مبسوطين احنا الاثنين اوى عارفين يوميها بجد نسيت كل حاجه كنت بفكر فيها وحاسيت انى بقيت فرحانه اوى
عارفين افتكرت كل ده ليه دلوقتى لانى دخلت مدونة العايدى ونفس درجة الفرح دى زعلت بيها لانى لقيت اخر حاجه كاتبها
"
هذه المدونة متوقفة لنفاذ الغرض من إنشائها"
بص يا عايدى حتى
ابقى نزل اخر اشعار انت كتبتها .. بص برضه انا عارفه انها حريتك الشخصيه ومش ليا الحق انى ادخل فى تصرفاتك و مش هاقعد اقولك ان ناس كتير بتحبك وناس كتير هاتزعل وكل الكلام ده بس هاقولك انا كنت داخله وعايزه اتكلم معاك لانى كل ما بحتاج اتكلم معاك او اطلب منك نصيحه او رأى فى اى حاجه كنت ببقى عارفه انت فين بدخل عندك واقعد اسمعك
بجد زعلت جدا