اخطاء لا يمكن تصحيحها

احيانا نرتكب خطأ

وعندما نحاول تداركه يكون قد فات الاوان

عندها نحزن كثيرا

عيد ميلاد حبيبى

يوسف بكرة هايتم سنتين ربنا يخليك ليا يارب

مش عارفه اقول ايه جوايا مشاعر كتير اوى فى السنتين دول يوسف هو محور حياتى لينا مع بعض ذكريات كتييييييييييييييير اتكلمنا كتير مع انه لسه يادوب بدأ يتكلم اتكلمنا طول السنتين لكن من غير كلام بفهمه من غير ما ينطق بيحس بيا من نظرة

اه تعبت معاه كتير واتعذبت كتير لكن مجرد ضحكه منه بتنسينى كل ده

يوسف او اوسوف زى ماهو بينطق اسمه مختلف عن اى طفل الغريب انى عمرى ماتعاملت معاه كاطفل حاسه انه كبير

وهو دلوقتى بيتمرد عليا متخيل انى حد صاحبه مش مامته استحاله اخد قرار زى اى ام كده وامشيه هو دلوقتى بيختار يلبس ايه اجى البسه يروح يفتح الدولاب ويختار حاجه تانيه يصر انه يلبسها

يوسف بيقلد الاصوات بالظبط ودقيق جدا فى ملاحظاته يعنى كل حد فينا ليه لزمه فى كلامه يوسف يقعد يلاحظ وفجاه الاقيه يقول اللزمه بتاعتى او باباة بما انه مابتعاملش مع حد غيرنا

يوسف ودنه حلوه جدا لو قلتله كلمه بنغمه معينه يقولهالك بنفس النغمه ولو سمع اغنيه يدندن لحنها بالظبط من غير اى نشاذ ولا تغيير بالرغم من انه لسه مش بيتكلم كويس ماشاء الله عليه

يوسف ناقد جدا فجأة تلاقيه اتريق على حاجه بتقولها ويقعد يضحك عليها ويعدهالك تانى

كانوا اصحابى زمان بيعلقولى على كلمه اوف واحمد الدرينى اول حد لفت نظرى قالى انى بقول اوف للزهق واف بطريقه تانيه االاعجاب بشىء واوف تانيه للاقرف

يوسف دلوقتى بيعمل نفس الحكايه

اصلا من سنه ونص لما يبقى زهقان الاقيه مشى وهو باصص فى الارض ويقول اوف بيموتنى من الضحك انه عارف يزهق ويمل فى السن ده

اوسوف بيحب اغنيه جدو على جدااااااا اول لما سمعها خاف منها اوى ولازم يسمعها وانا قاعده جنبه لو قمت يجرى ورايا خايف ويعيط اشيله وارجع تانى نسمع الاغنيه مع بعض وبالرغم منه انه كان بيخاف منها لو خلصت يفضل يعيط عشان اشغلهالو تانى ويسمعها برضه وانا قاعده معاه دلوقتى خلاص مش بيخاف منها بيحبها ويفضل يتنطط عليها ومايرضاش ياكل الا وهى شغاله ويفضل يقلد اصوات الحيوانات اللى فيها

يوسف بيحب القطط جدا واول لما يشوف واحده يجرى وراها ويمسكها من ديلها اصلا لازم كل يوم ينزل من البيت عشان يدور عليها

مشكلتى الايام دى انى مش عارفه افهمه الضماير يعنى بيشاور على بقه ويقول بقى ولما يشاور على بقى انا بيقول بقى برضه اشاور على بقه واقوله ده بقك وده بقى يشاور على نفسه ويقول بقك ويشاور عليا ويقول بقى مش عارفه افهمه ازاى

احلى حاجه فى السن ده ان خياله واسع جدا مثلا لما يكون مش عايز ينام اقوله القطه هاتيجى تنام فى حضن ماما وانت لاء يجرى على اخر السرير وكأنه بيضرب القطه ويقولها أأه ويجى جرى بسرعه ينام فى حضنى قبل القطه يعنى اتخيل ان فيه قطه معانا فى الاوضه وراح ضربها كمان وجى جرى قبلها

يوسف بحبك بجد ياكل حياتى وعمرى كل سنه وانت طيب وبخير ربنا يحفظك ويخليك ليا يارب

البعض نحبهم

البعض نحبهم
لكن لا نقترب منهم ........ فهم في البعد أحلى
وهم في البعد أرقى .... وهم في البعد أغلى



والبعض نحبهم
ونسعى كي نقترب منهم
ونتقاسم تفاصيل الحياة معهم
ويؤلمنا الابتعاد عنهم
ويصعب علينا تصور الحياة حين تخلو منهم

والبعض بحبهم
ونتمنى ان نعيش حكاية جميله معهم
ونفتعل الصدف كى نلتقى بهم
ونختلق الاسباب كى نراهم
ونعيش فى الخيال اكثر من الواقع معهم

والبعض نحبهم
لكن بيننا وبين انفسنا فقط
فنصمت برغم الم الصمت
فلا نجاهر بحبهم حتى لهم لان العواقب كثيرة
والعواقب مخيفه ومن افضل لنا ولهم ان تبقى الابواب
بيننا وبينهم مغلقه

والبعض نحبهم
لاننا لا نجد سواهم وحاجتنا الى الحب تدفعنا نحوهم
فالايام تمضى
والعمر ينقضى
والزمن لايتوقف
ويرعبنا ان نبقى بلا رفيق

مافيش ابلغ من كده فى الدنيا
جبران خليل جبران

"الحل فى الجنه واذا لم تكن هناك جنه فاإن الموت كفيل بالحل"

امام الموت تصبح كل الكلمات تافهه مثل الحياة لكننا نستمر فى الكلام ..لماذا؟

امممم..لأننا تافهون .. فارغون ! يجوز .

منذ ايام تابعت خبر انتحار شاب امام عجلات المترو للاسف

الازمه تكمن فى البشر بالفعل ستجد الكل يتحدث ويقيمه ويصدر الاحكام

"حرام عليه ليه يعمل كده " "ده كده مات كافر وليعوذباالله "

"ده اللى يموت كافر ده ربنا مش هايسمحه ولا يرحمه ده فى النار"

"ده اللى بينتحر ده ربنا اصلا بيبقى غضبان عليه"

فالتصمتوا.. التقديس الوحيد للموت هو الصمت

فالتصمتوا ايها الكافرون ..الم يعلموا ان الكافر هو كل مادفع هذا الشاب للموت

الم يعلمو ان الكافرون هم من كانو حوله ..عندما احتاج لمن يهون حزنه او يطبطب عليه ولم يجد الكافر هو من دفعه لذلك الشعور المميت الكافر هو من سود الحياة فى عينيه الكافر هو المجتمع الذى يجلده فى كل حركه وكل تصرف .. عيب .. مايصحش .. كده تبقى فاشل مش لاقى شغل يا اخى اشتغل اى حاجه يشتغل اى حاجه ..اخىيى ده شغال حارس امن او عامل يبقى ملوش مكانه فى المجتمع ولا نحترمه .. ياة عندها 30سنه ولسه ماتجوزتش ياحرام عانس وانزل جلد فيها تتجوز اى حد يتقدم لها عشان تخلص من النظرة دى يطلع ميتين اهلها فى نظام ذكورى ولازم تستحمل وحافظى على بيتك الست المحترة لازم تتستحمل تتطلق ..ياااااااااااااى مطلقه وانزل جلد فيها تانى ..الكافر هو حاكم ومسئول همه الوحيد من مكانه هو تكبير كرشه ..الكافر هو من سرق من شاب حلمه الكافر هو من دفع شاب لمغادرة بلده والموت فى الطريق او الوصول والموت برضة

الحاكم كافر المسئولين كافرون الحكومه كافرة

الحزن كافر الغربه كافرة الحياة كافرة

المجتمع كافر الجميع ولكن ليس هو

فالتصمتوا ايها الكافرون

ايه اجمل حاجه فى حياتى

لاء ماينفعش السؤال كده

مين حياتى نفسها كيانى حبى تكوينى فكرى عقلى روحى

عارف لما الكلام يعجز عن وصف شعورك كل الكلام ده حساة تافه مافيش لغة على وجه الارض ممكن توصف احساسى

يوسف

هو فرحتى

مع يوسف بكتشف نفسى وبكتشف الدنيا

بتعلم كتير اوى من يوسف

يوسف عالم لوحده

يوسف دنيا كامله

يوسف دمه خفيف جدا

هو نايم دلوقتى بس وحشنى اوى

يوسف مختلف عن اى طفل فى الدنيا اولا دلوقتى بقى عنده سنه و3 شهور

يوسف بيقشعر لما ياكل عنب وبيموت فى الليمون ولو خدتها منه يفضل يعيط

يوسف دلوقتى بيحب جدا الهولز مش عارفة ازاى

يوسف بيصحى طول اليل وبينام بالنهار

يوسف حلو اوى

علاقتنا غريبه عارف لما تتعامل مع حته منك مع نفسك

يوسف لما بكون زعلانه بيحس بيا

مره كنت بتفرج على فيلم ودموعى نزلت لقيته ساب اللعب وجالى جرى

يوسف لسه مابيتكلمش بس بصلى وحضنى وادانى بوسه

بعدها راح جابلى الفوطه

بجد ضحكنى جدا وحضنته اوى هو لسه مش فاهم الدموع دى يعنى ايه شايف ان دى ميه يبقى ننشفها بالفوطه

هو لسه مش فاهم اه بس بيحس بيا اووووى

عارفين الاحساس ده اجمل شعور فى الكون

امبارح يوسف قعد فى حضنى يتفرج معايا على التلفزيون ودى طبعا من اللحظات النادرة

جدا لانك صعب جدا تقدر تثبت يوسف لمده ثانيتين

وانا حضانه كده مش عايزه حاجه من الدنيا عايزه الوقت يقف

الوقت بيجرى بسرعه اوى

عارفه هايجى وقت هالقيه كبر وعنده حياته وشغله وهيبعد عنى

بحاول اسرق لحظات من الزمن

ربنا يخليك ويحفظك ليا يارب

وعدتك يايوسف مامتك ياجميل اوى من اول يوم جيت فيه الدنيا دى

انى هاحميك منها ومن كل شىء ومن كل بنى ادم فيها لحد ماتبقى قادر تعتمد على نفسك

انت فوق الجميع زى الاهلى كده بالظبط

انت اولويتى

مش هاتكسف ولا اخاف على زعل حد انا اصلا مش محتاجه كائن فى الدنيا دى غيرك

انت اكتفائى انت دنيتى انت حياتى

ياحياتى

بحبك ياعقل ماما

على فكرة يوسف قالى ماما