Tuesday, March 13, 2007

حاجات عبيطه


عارفين انا نفسى اوى اعمل فرقه نطلع على المسرح
نتجنن بجد نغنى كلمات مش موزونه والحان مش مترتبه نقول كل اللى يجى على بلنا مش عارفه
حلمى انى انعكش شعرى واقف امسك الميك اتكلم واغنى واتنطت واصرخ واصرخ واصرخ واتكلم بحريه اقول على احلامى وحاجات خنقانى
واكون لبسه لبس مبهدل مش ليق على بعضه وفى الغالب هايكون مش لبس بناتى وكمان مش حطه ميك اب
عارفين نفسى اوى اروح ديسكو بس اصحابى مش بيرضوا بيقولولى بطلى هبل
نفسى اوى اكون مصممة ديكور
ونفسى كمان اكون مخرجه
نفسى اعمل روايه او مجموعه قصصيه عارفين مش عيزاها تكسر الدنيا ولا تكون احسن رواية اتكتبت فى الكون ولا حتى اعلى او اقل من اى حاجه حد عملها
..انا بس عيزاها تكون حالتها ما ينفعش تتقارن بحاجه غيرها
عارفين نفسى اوى اتعلم ارقص تانجو وصلصا .. بجد اووووووووووى
نفسى اعمل برنامج للاطفال اقولهم فيه ماتشربوش اللبن لو مش بتحبوه ما تسمعوش الكلام لو مش مقتنعين
نفسى اعمل برنامج راديو يكسر الدنيا مش مهم اقول كلام يعجب الناس بس المهم يرضينى انا
نفسى اكتب فيلم حلو
كان
نفسى اعمل حجات كتييييير اوى ..ممكن اكون قلت عليها.. و حاجات اكتر مقلتهاش
بس معملتهاش
لانى خفت وبخاف