Wednesday, June 20, 2007

لا يجوز ان تقارن الالهه بالبشر

فى احد الازمنه ويمكن ان نقول انه كان فى احد الاساطير الخياليه
_عارفه ممكن حد يقولى ادام قولتى اساطير تبقى حاجه خياليه خلاص
احنا عارفين .. على فكرة اللى هايقولى كده مش هارد عليه_ اكمل بقى الحكايه
إله يعيش هناك فى عليائه ..جالس يتابع تحركات البشر متكىء على وسادته المفضله وفى يديه عنقود من العنب ..لكنه شعر بالملل او يمكن ان نقول قرر انه يريد تغير لقد مل فقرر ان يهبط للبشر يتعامل معهم لعله يجد ما يسليه او يمتعه عاش الاله وسط البشر اعجبته اللعبه ..تماهى فيها.. اندمج اكثر ..
تعامل مع البشر على انه واحد منهم ..عمل لكى يحقق ذاته ولكى يحصل على نقود كان يرجوا ان تكون كفيله بأن تجعله حر _لانه كاإله يعلم ايضا ان من يملك رأس المال يملك السلطه _ احب بالرغم من انه كإله يعلم ايضا ان الحب شىء عبثى ومؤلم وليس له فائده واحده ترجى وكااله برضه كان يتعجب على البشر كيف يفقدون حريتهم فى الحب بكل سهوله بالرغم من انهم طوال الوقت يناضلون لكسبها وكيف يتعذبون فيه بنفس راضيه وهم من اهم شعاراتهم مناهضة التعذيب ما علينا انهم بشر لا نستطيع فهمهم وبالفعل اقتحم الحب لانه من شيم الانسان وهو يريد ان يعيش التجربه كامله ..تماهى اكثر مع تجربته ولعبته ..ومع الوقت
نسى انه إله ..احب.. اتعلمون؟ لدرجه انه شعر بالغيرة
تحدث وانصت وتحدث
سمع وسمع وسمع
..تعذب .. وتعذب ..وتعذب ..وتعذب شعر بتلك النار بداخله وتلك الافكار تتناوبه ومع الوقت بدأ يعانى اكثر لكنه فجاة تذكر
انه إله
يجب ان يصعد لعليائه لا يجب ان يخالط البشر لا يجب ان يشعر بمشاعرهم لا يجب ان يقارن نفسه بهم
انه إله ..فعلا لا يجب ان يقارن نفسه ببشرى
اكتشف مدى السخف الذى ارتكبه لكنه لم يستطع ان يتخلص من تلك المشاعر الفظيعه وتلك النارالمشتعله بداخله
بس خلاص الحكاية خلصت ايوه دى النهايه بالرغم من انه عارف انه اهم من البشر وماينفعش يقارن نفسه بيهم حتى بالرغم من ان هو اللى هايكون الفائز فى المقارنه دى بدون جدل اساسا بس برضه ما ينفعش

لا يجوز ان تقارن الالهه بالبشر

26 comments:

Alaa said...

أولا
الحمد لله على السلامة بعد الغيبة الطويلة دي

ثانيا
يمكن اكون فهمت المغزى من الموضوع و يمكن لا بصراحة
اصل انا مخي على أدّي :)

بس اللي انا شايفه
اننا مش المفروض نتكلم عن الاساطير دي و نحطها في دماغنا لانها واحدة واحدة بتزرع جوانا افكار عن كلمة آلهة
و هي جمع كلمة إله
مع أننا نؤمن أن الله واحد
و نلمس فيها صفات آلهة
و هذا أيضا خطأ

لا يجوز لنا الخوض في الذات الإلهية لأن عقولنا الصغير لن ترتقي لتتخيل أي شيئ

ربنا يبارك فيكي و يحفظك و يباركلك و يدخلك الجنة
قولي آمين

عمر عاشق القرآن said...

هو اولا انا طبعا مش هقولك : "ايه ده ؟ عيب .. هو اله واحد ولا اله الا الله "
لانى عارف انك مؤمنة وأحسن منى

انا برضه مش متاكد اوى من مغزى الاسطورة

بس عايز اقولك حاجتين ::
اسلوبك عاجبنى -
بلاش نكتر فى الكلام ده علشان زى ما اللى قبلى (علاء) قال

أحمد حربية said...

شوية كلام كتييير عن الغيبة الطويلة والعود الأحمد والحجات دي وبعدين نقطة و من أول السطر

هقول بعد النقطة دي ايه مش عارف بس اللي انا متأكد منه ان الحب هو الحاجة الوحيدة اللي ممكن تخلي البشر ينسوا شوية الطين اللي هم مخلوقين منه ليتحولوا إلي.. ....احم أي شيء ليس له علاقة بالطين

أحمد

دعاء عادل said...

يا جماعه عايزه اقول حاجه قبل ما باقى التعليقات تجيلى بالشكل ده انا والهى مش من كفار قريش ولا حاجه
وكلمه إله هنا مجازيه
مش بخوض فى الذات الالهيه ولا حاجه
ده موضوع خيالى فنتازى مالوش اى علاقه بربنا
ولو هاتكلم عن ربنا مش هاتكلم بالشكل ده اكيد يعنى
واقول تانى يا جمااااااااااعه كلمه اله هنا مجازيه بس خلاص
وبالنسبه للتعليقات

علاء
الله يسلمك
وعلى فكره الاسطورة دى من تأليفى وبالنسبه لحكاية ان المفروض مانحطش الاساطير دى فى دماغنا عشان بتزرع جوانا افكار عن كلمه الهه
بص احنا كلنا مؤمنين ان ربنا واحد ودى حاجه مفروغ منها ومافيش حد عاقل لما يقرا الاساطير دى تاثر فيه ويقول صحيح ده فيه اكتر من اله ده شىء عبثى جدا اكيد يعنى
وعمرك ما هتقابل حد اليومين دول مؤمن بتعدد الالهه الا فى حاله واحده اذا كان جاى بألة الزمن من الاغريق القديمه او يكون لسه جاى حالا من القريه الفرعونيه
وامين يارب
وشكرا على الدعاء

مشروع بطل
دى مش اسطورة حقيقيه دى اسطوره من تأليفى
وشكرا على ذوقك

احمد حربيه

انت فين من زمان
اولا شوية كلام كتير برضه رد على الكلام الكتير اللى انت قلته ونقطه برضه ومن اول السطر
مش عارفه هل الحب اصلا موجود ولا مجرد وهم وهل الانسان بيرتقى لما يحب ويتحول الى اى شىء ليس له علاقه بالطين ولا اصلا مش هايعرف يحب اذا كان من البدايه هو كان شىء ليس له علاقه بالطين الحقيقه انا مبقاش عندى اجابه لاى شىء

nohamy said...

بصي هيه الدنيا كدة
حاجات متناقضة جوه بعض
لو ركزتى اوي مش هتعرفى حاجة خالص

مع اننا بنعيش تجارب ممتكررة بس بنعيشها هنعمل اية يعنى

سارة بنت الدشناوي said...

ازيك يا دعاء ، انا معرفكيش بشكل شخصي لحد دلوقت عشان الظروف عمرها ما جمعتنا في الجرنال وانا دايما زي فرقع لوز اروح اسلم الحاجة لكساب و امشي بس ان شاء الله اشوفك قريب ، نرجع بقة للموضوع ، اولا انا حعلق علي كلامك معتبرة استخدام صيغة اله هنا مجاز عن اللي طبيعته غير البشر و مش قادر يفهم ليه هم بيرتكبوا الحماقات اللي بتبان كدة للي من برة الموضوع ، و ان اللي يجرب مشاعر البشر و ظروفهم يقدر يفهم ده بس يمكن اختيارك للمجاز هنا مش في محله ، لأن ممكن الكلام ده ينطبق علي كائن في ما بينا و بينه ندية او احنا اعلي منه يعني يمكن (بصورة فرضية طبعا) لو الطيور او الحيوانات تعقل متقدرش تبرر تصرفاتنا أو الجن او غيرهم بس اكيد مش الله لأن اللي خلقكك و خلق جوانا التناقضات و التداعيات النفسية و الدوافع دي كلها هو ربنا و اكيد هو ادري منا بيها ، و انا فهمت قصد علاء صح ، هو مش عايز يقولك انك بكدة حتنشري فكرة تعددية الآله و لا حاجة بس الكلام عن ربنا بندية ممكن ينسيكي اننا مننفعش ند ليه ، مننفعش بعقلنا المحدود اللي هو اداهولنا نفهم هو بيفكر ازاي و حكمته ايه ، زي ما نظرنا محدود عقلنا كمان محدود و زي ما انت متقبلة فكرة مثلا ان و انتي واقفة تجاه القبلة تصلي في كعبة بس بعيد نظرك مش جايبها ، في كمان معاني ممكن عقلك تكون قدرته مش جايباها ، لكن التفكير بالصورة دي يخليكي تقولي هو بيعمل فينا كدة ليه ، هو مش حاسس بينا ، او ايه الحكمة من ورا كدة ؟ ربنا مش قاعد في برج عالي مش عارف اللي بيحصل مع البشر لأنه هو اللي بيدبر لهم كل امورهم في كل وقت ، انا عارفة كويس ان ده مش قصدك بس عارفة كمان ان احسن مدخل بيدخلنا منه الشيطان هو من خلال شطحاتنا ، عشان انا زيك و يمكن بفلسف الحياة اكتر منك كمان و علي العموم ربنا يوفقك

FadFadA said...

دعاء
ياااااااااه أخيرا , كل ديه فترة توقف و غيبة ؟ حمد الله على السلامة
:)

جميل جدا , مع التحفظ على استخدام لفظة اله مهما كانت مجازية ... المهم
الحب لنا كإكسير الحياة , نريد أن نتحرر من كل شيء للحصول عليه و عندها نقع أسرى فيه
طوال حياتنا نبحث عنه لنُحسب من الأحياء , و عندما نجده نموت فيه
هو كذلك
لماذا ؟
لإنه كذلك , موجود دون تفسير
السؤال الأهم , ما هو الحب الحقيقي الذي يستحق منا كل هذه التضحية ؟

Anonymous said...

عارفة يا دوعااء كان نفسى تخلصى الاسطورة دى ازاى؟
انك تخلى الاله بعد ما اشتغل وحب وغار كمان
انك تطورى المنحنى الدرامى للاسطورة وتخلية يقتل
ايون يقتل اللى بيغير منه او حبيبته او الاتنين
المهم انه يرتكب اللى كنت مستنياه منه

حنان الجوهرى

إنسان || Human said...

هو يعني إيه مجازيه
....
ولا بأي شكل نقدر نفكر حتى في الألوهية لأنه أبدا عمره ماهيفكر بالطريقة دي أبدا ....
دماغنا قاصرة جدا على إستيعاب الألوهية
ونحن بقصورنا نتخيل الأله يشعر ويأكل ويشرب ويجلس وينام ويحب سبحان الله
نطبق كل مانتصف به وكل مانشعر به وصفاتنا نحن البشر على الأله..لأن هذا كل مانعلم
.........
أنا عارف كويس جد ومتأكد ان انتي هتلاقي مخالفين معك في الرأي وضد الكلام ده..ولكن أإريد ان أخبرك شيئا مهم
جدا ..ان مجرد التفكير (مش هقلك حرام وكفر )لا طبعا ولكن يمكن أن يوصل الى الشرك إذل لم نمنعه ونوقفه ..لأن الصحابة حتى كانو تواتيهم أفكار وكان الرسول صلى الله عليه وسلم يدعوهم للإستغفار
...




وبعدين مقارنة يين البشر والإله لأن لايوجد وجه للمقارنة أساسا
هو إحنا ينفع نقارن بين الإنسان والميكروب أو الفيروس

دعاء عادل said...

بنى ادم مع وقف التنفيذ

فعلا عندك حق الدنيا دى غريبه جدا ومهما عشناها مش هانقدر نفهم
ربنا يعنا
ويرحمنا بقى
شكرا على مشاركتك وفهمك


سارة الدشناوى

ازيك يا قمر انشاء الله نتقابل قريب
شكرا كتير على تعليقك وبجد نورتينى
بس انا مش قصدى كده برضه انتى مش فهمانى
لما نتقابل نتكلم
وربنا يوفقنا كلنا

fadfada

الله يسلمك
كل اسئلتك منطقيه جدا هنتعذب ونستحمل ونفكر ونسئل بس فى النهايه هانخرج زى البدايه مش فاهمين حاجه
هى دى الدنيا وكل حاجه فيها وخاصة الحب مش مفهوم موجود دون تفسير


حنان الجوهرى انتمتى

اخيرا يا حنان -انتى الوحيده دلوقتى اللى فاهمه انا بتكلم عن ايه ربنا يخليكى ليا يارب -
تصدقى يا حنان كان هايعمل كده ويمكن كان ده اللى بيفكر فيه او يمكن لسه بيفكر فيه
انا بحبك اوى

human

اولا مش عارفه ارد على تعليقك لانك بتتكلم تقريبا فى مدار تانى خالص التعليق ده مالوش اى علاقه بالبوست بتاعى خااااااالص
اقولك مجازيه وانا مش بتكلم فى الاتجاه ده خالص
ترجع تصر ان ده قصدى وبعدها كملت تعليقك على بوست افتراضى فى دماغك
ليك الحريه فى ده طبعا
ثانيا
احنا مش ميكروب ولا فيروس

مع تحيات مركز الكون

msafa said...

الكلمة مجازية والله يعنى هى تحلف على المصحف انها مجازيه ( والله مجازيه ).بس
اما انا محسيتش ابدا انه اله لانه اتعامل بصفات البشر وطالما اتعامل بصفات البشر يبقى مننا بس عنده شوية خصوصيه . بكل بساطه يعنى
بلاش يعم تكتبى اساطير تانى لا من منقولك ولامن منطوقك .... علشان الناس تصدق
لا اله الا الله محمد رسول الله

أحمد المصري said...

أهم حاجة الفكرة الأخيرة ..جبتي من الآخر..عندك حق0
مع تحياتي00
والسلام عليكم0

Alaa said...

دعاء
أنا محتاج رأيك بخصوص الموضوع ده

تجمع مدوني مصر .. حقيقة قابلة للتنفيذ أم حلم بعيد عن الواقع

friend said...

فكره جديده ومتميزه
احييكي عليها
تحياتي

Diyaa' said...

أنا متفق مع سارة ..طبعاً حمد الله علي سلامتك للمدونة لكنك موجودة في الدستور علي طول
ورغم اختلافي معاكي في أكتر من مقال بس عارف إني هكون مزعج لأني ببساطة رغاي
الأول بخصوص الحب أنا مريت بتجربة شخصية ومكانتش وهم ..واللي أثبتلي كده إني كنت ناويها رهبنة
بس لقيتني فعلاً حبيت..وفي النهاية كانت الكلمة الأخيرة لربنا وأكيد ليه حكمته
واللينك ده هيفهمك إلي حد ما أنا بتكلم عن حب شكله إيه ولو إني مش هعرف أوصفه مهما كان الكلام
http://belong-2-za-humanity.blogspot.com/2007/02/talk-to-remember.html
وأتمني بعدها أعرف..هل لسه الحب حاجة ملهاش لزمة في نظرك ؟! ولا لأنك لسه ربنا مقدرلكيش تمري بيه بجد ومع التزييف اللي قام بيه البشر علي أكمل وجه للكلمة الجميلة دي شكيتي في وجودها أصلاً
وبالمناسبة كان حب نت..اللي خالد بيه كساب من فوق الكرسي العالي الخاص بيه اعتبر كل اللي حبوا حد بيكلموه علي النت ناس بتوهم نفسها كجزء من مجتمع مخرتأ مش بيسمح يا حرام للحبيبة بالقبلات والأحضان كأن الجواز ده عملوه عشان بس العيال تضمن تلاقيلها أب..ورغم إن في استثناءات قد تؤكد القاعدة بس هو مش معتقد إلا في رأيه

بالنسبة بقي للبوست بتاع حضرتك ..معلش..انتي من حقك تفكري طبعاً..وتناقشي حد في حاجة زي كده
بس تفتكري..بما إنك بيقرالك ناس كتير أوي في الدستور الأسبوعي نفترض إنهم 20 ألف بس مثلاً...تفتكري إنك مش هتتحملي أدام ربنا مسئولية إن واحد حظه من التعليم لا شئ..يبدأ يفكر في ربنا بالشكل ده وفي وسط مجتمع مخرتأ زي ده هيتوه
في غيبيات مش عرفناها عشان ربنا ميكونش ند لينا وبالتالي نفوسنا هتصورلنا إننا ممكن نحاسبه
أسطورتك جميلة بس فعلاً لفظة الإله كان ممكن تتعدل ولو بكلمة كائن..كائن أسطوري ليه مكان بعيد في الكون بمعزل عن البشر...فلنفترض إنه إبليس مثلاً :)) اهو ده فعلاً عارف وفاهم لكنه تحدي اللي خلقه ومكمل في التحدي بتاعه علي أكمل وجه الصراحة...
المهم لو افترضنا إنه ابليس..نزل وحاول يشتغل وفقاً لقدرات وقواعد البشر وكذلك حاول يحب ..ويغير...ويكون أناني وميشوفش في الدنيا غير نفسه ..ويكون ضعيف ووحيد ..ويتعرض للخيانة والغدر ..ويتنرفز وفي الآخريقتل بنفسه لأنه ضعيف..ويسكر ..ويعمل كل الحاجات اللي بتثبت أد إيه البشر أغبيا لأنهم مش بيتعلموا من أخطاء سابقيهم..إلا من رحم ربي طبعاً
وفي الأخر يرجع يندم علي إنه قل من قيمة نفسه كأسطورة بلا نقط ضعف مادية..ويؤكد إن الأساطير ملهاش مكان علي الأرض رغم إنه في الأخر كائن خلقه ربنا ولما اتمرد عليه وافتكر نفسه ند ليه سابه يكمل ويغوي الضعفا من البشر وفي الأخر جزائه معروف
أعتقد إن كده الموقف شكله أشيك وفكرتك وصلتني برضه وعبرتي عنها وتجنبتي شبهة اللفظ..رغم إن الأعمال بالنيات وأكيد نيتك متعبرش عن مدلول اللفظ
تحياتي وعلي فكرة نظام التعليق ده بيهنج أوي ..لو غيرتيه الواحد يعرف يرغي براحته :)
سلام عليكم

Diyaa' said...

طبعاً لو اهتميتي ..في مقالة ليكي اللي هيا مقال الأرنب والتعلب..الأخيرة في أخر عدد اسبوعي
ممكن تبعتيها ...او حتي تنزليها بوست
ميلي أهو
infernal_themind2050@yahoo.com
ولو قلتي حاجة رداً علي كلامي ارجو إنك تبلغيني في المدونة لأني مش متابع معلش
تحياتي

elkamhawi said...

جامدة جداً يا دعاء
وانا مع راى حنان خالص
وكنتى ممكن تخليه يجيب عقد عمل ويروح السعودية نيهههااااا

لو كنت أعلم said...

دعاء
بجد رائع

أتمنى إني أكون فهمت اللي ورا القصة دي صح

لكن قد نجد القوة في كمال الحب


بس المشكلة هو إزاي نوصل لكمال الحب ده



وإزاي نعرف إن اللي بنحبه عند استعداد للذوبان فيمن يحب

استعير قولة ايليا أبو ما ضي

لست أدري

المصير said...

البلوج اكثر من رائع يا دعاء ومهيبر خالص ...... وماشاء الله بتختارى موضوعات فعلا جميله قوى

MoHaMmAd said...

دعااااااااااء عادل ...والله ماكنت أعرف إن واحدة من أحب الصحفيات عندى عندها بلوج ...أنا آسف على جهلى .....أنا أول ما لقيت الاسم فى أحد المدونات جيت جرى....واتأكدت إن ده مش تشابه أسماء ...وكمان شفت اسم حنان الجوهرى ...اتأكدت أكتر...اعذرى جهل أحد المعجبين بكتابتك انتى وكل اللى بيكتبوا فى ضربة شمس بإن ليكى مكان تانى ممكن يقرالك فيه...أنا بأبدى إعجابى بس الأول ...و قريت كلامك عنأحمد العايدى ماعرفش ليه اخترت البوست ده بالذات ...وهاقرا كل البوستات وبالذات الأخير ده و ارجع أديكى الكومنت المتين...سلام مؤقتاً...موحا

MoHaMmAd said...

بصى البوست ده مش متفق انك تتكلمى كده عن الإله...بس هى برضه وجهة نظر وانتى أكيد حرة ومش مستنيانى أقول لحضرتك كدة...بس الأسلوب مش هاتكلم فيه بأه كفاية صحابى واجع دماغهم بأسلوبك انتى وخالد كساب و حنان الجوهرى وأميرة حسن و طلال فيصل ...فا مش هاتكلم عن الأسلوب ...شفت البلوج كلها تقريباً ...عاجبنى أوى أوى أوى حاجات عبيطة واللى بعده ...أنحنيلك يا دعاء ....مش هاتتخيلى أصلاً فرحتى ...مبسوووط أوى ....وطبعاً البلوج بتاعك أصبح فى الفيفوريت ليست وفى المدونة فى الفيرى امبورتانت بلوجس

islam yusuf said...

على فكره موجة الالحاد كترت أوى اليومين دول
هاتلاقى مدونين ملحدين كتير
ربنا يستر

Anonymous said...

يا ريت ترجعي و تدوينى تاني انا فعلا بأستفاد فمتأطعيش خيرك

FadFadA said...

دعاء
قرأت في آخر مقال لك في الدستور عن موضوع الزواج
مش عارف الموضوع ده بجد و لا لأ ؟
لو بجد
ألف ألف مبروك
بارك الله لك و بارك عليك و جمع بينكما في خير
معلهش جاءت متأخرة

Do7a said...

haya 7ekaya 3'areba fe3lan bas nehayetha ana mast3'rabthash awe l2any waska en el7ob momken ya3mel aktar men kedah bas 3'areba enoh elah wa estaslem lemasha3roh kedah ...... bas aked kawem kterrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrr

DR.HAMAS said...

أختنا الكريمة دعاء

أكرمك الله و أسأله سبحانه أن يرضى عنك و يريح قلبك

حقيقة وجدت كلماتك هذه أثارت حفيظة بعض الأصدقاء عن قضية إله

و قد رددتى على كلماتهم و أوضحتى .. أكرمك الله

انا مثلهم صراحة أثارتنى الكلمات لأن طبيعتنا كمصريين متدينين بطبعنا و نخشى الاقتراب من أى كلمة يمكن أن تكون سببا فى سخط الله بأى حال من الاحوال

أنا فهمت قصدك من أسطورتك التى ألفتيها أن عاطفة الحب حينما نجربها تتملك من النفوس و تأثيرها العذابى سيذوقه كل من يجرب الحب حتى لو كان فى الاصل جبل

على العموم أكرمك الله