دخلت على سريرى على طول ومش رضيت اقعد اتعشى معاهم عشان ما حدش يلاحظ الدموع اللى فى عنيا
سريرى اخدنى فى حضنه قعدت اعيط كتير بس لحظه اخدت القرار
انى مش هاعيط تانى .. اصلا ما فيش اى حاجه فى الدنيا تستاهل اعيط ليه ؟وانام زعلانه ليه ؟..دلوقتى اقوم اشتغل افيد
مسحت دموعى و قمت فتحت الكمبيوتر ..قعدت قدامه دلوقتى
حاولت اشتغل .. بس مش قادرة .. ومش قادرة اكابر اكتر من كده .. انا ضعيفه اوى مش قويه ولا حاجه .. انا بردانه اوى .. وخايفه اوى..
محتاجه حد يحضنى اوى دلوقتى ويطمنى
نفسى اجرى على بابا وماما وانام وسطهم زى زمان عشان ما احسش انى خايفه
بس عمرى ما هاعمل كده دلوقتى عشان مش اخليهم يقلقوا عليا لانى عارفه انهم هايقلقوا عليا ويزعلو اد ايه لو شافونى فى الحاله دى
وانا اموت نفسى بس بابا وماما مايزعلوش لحظه .. يارب خليهم ليا يارب انا من غيرهم ولا حاجه ..
انا مجرد وجودى معاهم هنا دلوقتى بيطمنى اوى .. بس اللى مخوفنى اوى انى المفروض هابعد عنهم .. انا مش عايزه ابعد عنهم خالص عايزه افضل معاهم هنا يارب اموت قبل اليوم ده يارب يا رب انا مش عايزه اى حاجه تانيه من الدنيا الا انى افضل معاهم بس يارب..
كان نفسى علاء يبقى هنا عشان اتكلم معاه بس هو مسافر دلوقتى
انا بحبك اوى يا علاء ومفتقداك اوى
وحشنى اوى بجد دخلت المدونه بتاعتك اتونس بكلامك واحس طيبتك حنيتك وشقاوتك والحقيقه كمان طمعا فى ابتسامه اهرب بيها من الحاله دى
واتمنيت تكون دخلت كتبت بوست جديد او رديت على التعليقات
بجد يا علاء محتاجه ليك اوى دلوقتى
فضلت اسمع الاغنيه اللى انت حاطتها .. عارف تأكدت انك حاسس بيا دلوقتى عارف حسيت الاغنيه اوى خلتنى اعيط اكتر .. لاء خلتنى انهار
اصل نفسى صعبت عليا اوى يا علاء..
.. انا عايزه افضل مع بابا وماما واخواتى انا خايفه اوى ..هل ممكن اصحى فى يوم من غير ما ماما تيجى تصحينى وتقعد تتحايل عليا وتتكلم معايا وتجبلى مج الشاى فى السرير عشان افوق واقدر اصحى ولا احسسها بيا لما اكون مضايقه وحنيتها وتحفيزها وتشجعها ليا ووقفتها جنبى طول الوقت .. هل ممكن استحمل انى وانا سهرانه باليل ملاقيش علاء جاى يتكلم معايا ونفضل ندردش لحد الصبح او يفاجئنى بكوباية عصير او شاى وانا قاعده بشتغل .. ولا الشيتوس والمصاصه اللى ضرورى يشتريهم ليا كل ما يبقى جاى من برة.. ولا حنية ولاء وسؤالها عليا كل دققتين لما اكون تعبانه ولا فرحتى لما بابا يجى من الشغل ونقعد نتفرج مع بعض على التلفزيون ومنقشتنا وفرحتى لما بشوف فخرة بيا والفرحه فى عنيه لما اقول رأى يعجبه ولا لما يفاجئنى بحاجه وهو جاى من الشغل لمجرد معرفته انى كنت عيزاها و لو فى مرة لقانى زعلانه ممكن يهدلى الكون كله.. ولا كريم واستحمالة لرزالتى عليه ومعاملتى النديه ليه بالعكس هو اللى بياخدنى على قد عقلى بالرغم من انى الكبيرة ولا الهوهوز والبونبونى اللى بيشتريم ليا وهو جاى من الدرس .. ياه اتكلم على ايه ولا ايه .. هما مش بيحبونى لانى بسمع الكلام ولا لانى بعمل اكل كويس ولا لانى.. ولا لانى.. ولا لانى ..
بيحبونى وبس كده من غير مقابل وهما بالنسبه ليا كل عمرى كيانى وجودى من غيرهم عمرى ما هبقى انا ..من غيرهم انا ماليش لزمه من غيرهم انا ماليش وجود اصلا هما الوجود
انا عمرى ما اقدر ابعد عنكم ابدا
انا عايزه افضل معاكوا
بذمتك ابقى عقله لو سيبت الحب ده كله ؟!
اصلا اسيبه واروح فين لحد يعاملنى كأنى جاريه حد ياخدنى من اهلى ويبقى هو كل حياتى واذ فجأة بعد خلاف بسيط اكتشف ان انا مجرد شىء فى حياته مالوش لزمه مجرد ديكور بيكمل حياته لان ضرورى يكون عنده زوجه مطيعه تطبخ وتمسح وتكنس .. وطول ما هى كده وبتقول حاضر هايفضل يقولها بحبك وحورات ولو مش كده او لو اختلفت معاه يختفى الحب اللى كان عمال يحكى فيه -وصدقته الساذجه - ومش بعيد يخيرها بين انها تعمل اللى هو عايزه او يسيبها
انا اللى يحبنى يحبنى من غير شروط يحبنى لاخر لحظه فى عمرة واوبشن انه يبعد عنى ده مايكونش مطروح اساسا حتى لو حصل ايه ومايكنش فى حاجه فى الكون ممكن تخليه يفكر مجرد تفكر انه يبعد عنى
هل ممكن الاقى حد يحبنى فى المطلق كده ؟! او يكون حنين عليا ويخاف عليا بالشكل ده؟!
اعتقد ان الاجابه الوحيده هى
مافيش
عارف يا علاء انا خايفه اوى
وحاسه بالقهر اوى
بس عارف خلاص دلوقتى انا ماسحت دموعى خلاص بجد .. عارف كنت محتاجه افضفض معاك بس (:
و عارف برضه
"خلاص مافيش دمعة حزن عشانه "
انا عارفه انت هاتقولى ايه
بس
تفتكر ممكن حد يسامح حد خلاه يعيط من الساعه 11 لحد الساعه 5 الفجر
16 comments:
لا ياحبيبتي اللي بيحب حد بيحبه عشان هو وبس
وبيستحمله بكل حاجة فيه
وبعدين دودو القوية تقعد من 11 لحد الساعة 5 الفجر تعيط
اللي يفكر يجرحنا مش لازم نفكر فيه يادودو ياحبيبتي
عالعموم كلامي معاكي مش هنا
اولا انا بعيط دلوقتى
ثانياً انا بحبك قوى
ثالثاً متصورش انك ممكن تبعدى عنى فى يوم من الايام
بحبك قوى قوى قوى
وتعيطى وانا موجود يا دودو مينفعش
ما عاااش ولا كاااان اللي يخليكي تعيطي يا دعاااء ....
.
.
بجد آآآلمني كثييييرًا هذا الموضوع !!
أتمنى أن تكوني بخيـر بسرررعة ....
مفيش حاجه مستاهله العياط يابنتي
مع ان الواحد لازم يجيله لحظات و يعيط فيها
لاكن لو بصيتي من الناحية اتانيه و قولتي انا هفضل حزينه علي حاجه طول عمري يبقي مش هتعيشي الدنيا بتمشي متخليهاش تسبقيك
خليكى مع ربنا وبس
في ايه يا دعاء ؟؟؟
و الله انتي قلتي كلمه صح وكلام غلط
مفيش حاجه بجد تستاهل انك تعيطي عليها
ولا الدنيا كلها تستاهل دمعه من عينك
ثم انك قوية فعلا
لو انتي شايفه نفسك مش قوية كل الليحواليكي اقويا بجد
وربنا يخلليلك علاء ويخلليكي له وميبعدكوش عن بعض
بس بجد اجمدي كده :)
وفيها ايه لو رحتي لمامتك شوية ؟؟
على الاقل انتي هترتاحي .. وهي هتفرح عشان بنتها لسه هي الطفلة دودو الصغيره
يللا يا دعاء .. مفيش حاجه تستاهل
سلامو :)
(F)
دودو الحلوة الجميلة الطيوبة بتعيط ما عاش ولا كان اللي يعمل فيكي كده يا حلوة عارفه لو كان ده بعد فرحي كنت قلت حسدوكي يا حلوة اصلك كنتي زي القمر في الفرح
تعالي بقى وقولي لي عملك ايه الواد الوحش ده عشان تعيطي ياروحي بصي ياودو احنا البنات بس ساعات بيعز علينا نمشي من بيوت اهالينا عشان الدلع وبعد اللي انت حكيتيه طبعا الدلع كله عند بس هونيعلى نفسك كلاك فيه قر كبير من التهويل صدقيني ل الندية والنرفزة والاختلاف بيدوب مع اول ليلة تبقى في حضنه بالليل هاتحسي انه امك وابوكي واخوكي واختك وصاحبتك بس يادودو فيه حاجة مهمة قوي الرجل طفل صغير مش كبير خالص زي ما بيمثل طول النهار عايز كلمة حلوة ولمسة رقيقة ومعاملة بسيطة ومعقدة في نفس الوقت تلاقيه لان وبقى زي السكينة في الحلاوة انا عارفه ان الكلام ده متكرر ومكنتش بصدقه زمان بس جربي هتلاقيه هو الصح اسالي مجرب
يلا ياحلوة مش تزعلي ابدا
نسيت اقول لك انا اسفة اني معرفتش غير النهارده انت عارفه ربكة الجواز ودي تقريبا اول مرة اقعد ابص على المدونات بحبك وسامحيني
اميرة هشام
ربنا يخليكى يا اميرة ومش عارفه اقولك ايه لانك كلمتينى وسألتى علياربنا يخليكى يا جميله ما تقلقيش انا كويسه جدا
دلوقتى
علاء حبيبى
ربنا يخليك ليا طبعا ما ينفعش اعيط وانت موجود وعشان كده لما رجعت انا بقيت مبسوطه ربنا يخليك ليا يارب
ابراهيم
بجد يا ابراهيم شكرا جدا على اهتمامك
وفعلا بقيت بخير بسرعه بس عارف سعات الواحد بيبقى عايز يتكلم مع ناس تفهمه وتحبه
copa
انت عندك حق فعلا بس اسفه جدا ان اول مرة تيجى عندى المدونه تلاقى الكأبه دى
ونورت البلوج وشكرا على اهتمامك وتعليقك
مودى
عارف والهى هى دى الحاجه الوحيده اللى بتخلى البنى ادم يقدر يستحمل ويعدى
عبد الرحمن
ربنا يخليك يا على الكلام الحلو ده
عارف بجد سعات الواحد فى لحظات بيحس انه ضعيف اوى بالرغم من كل الكان مبينه
لكن حقيقى انا حسيت انا قويه اد ايه بكل الناس اللى حواليا
وحكاية انى احكى لماما انت مش متخيل ممكن يحصلها ايه بجد عشانى
انا دلوقتى كويسه بس وقتها كنت مخنوقه جدا وكنت محتاجه اتكلم مع حد اوووى وعشان كده كتبت البوست وحسيت اد ايه بجد قويه بكل الناس اللى حوليا واللى اهتمت وعلقت وحاولت تساعدنى بجد انا بقيت مبسوطه جدا وحاسة انى مش لوحدى
دعاء الجميله جدا
فى البداية كده الف مبروووووووك يا جميله على الفرح وانتى اللى كنتى بجد زى القمر وكان يوم حلو اوى زيك
فعلا يا دودو نفسى كانت صعبانه عليا اوى وده كل الحكاية انا بجد خايفه اوى يادودو مش عارفه صعب جدا ان الواحد يسيب حياته ويدخل فى حياة جديده تماما ده فى العموم لكن لما تحصل مشكله او اختلاف الواحد بيحس بالخوف اكتر ويبدأ يسئل نفسه ليه بقى انا اعمل فى نفسى كده ليه
وانا مصدقاكى فعلا يادودو وعارفه انك حاسه بيا وفاهمه كل ده وفعلا وانشاء الله الحكاية تبقى زى السكينه فى الحلاوه انتى الوحيده اللى قالتلى كده وصدقتها زى ما بتقولى عارفه كلامك طمنى اوى بجد واسئل مجرب
وربنا يوفقك يارب انتى وبيرو
وبتعتذرى ليه يا بنتى انا اللى اسفه انتى كنتى فى ايه ولا فى ايه اصلا يوم فرحك ده خرجنى من المود ده خاااااااالص وكنت مبسوطه
اصلا يا دودو اللى يشوفك لو فيه ايه لازم يبقى مبسوط انتى جميله اوى يا دعاء بجد وبحبك جدا وربنا يخليكى ليا يا قمر يارب
دانت اللي زي السكر والحلاوة في نفس الوقت سيبك هي النصيحة دي في الجون البيبي لازم تاخديه بالراحة ربنا يهنيكم يارب وييسر لكم احوالكم
تلقائي البوست دة جداا
ربنا يخلي لك اي حد بتحبية
ana mesh 3arfek ya DO3a2 .. pas klamek da 2asar feya awee w kan nefsy akalemek sa3ettha mesh 3aref leh !! yemken 7apet adardesh m3aky masalan aw nhazar sawa aw ay 7aga 3shan mesh pate2 en 7d ykoon ma5no2 5als .. rapna ywafa2ek fi 7yatek .. wana pesara7a atamanna enny akon sadek leky .. take care
بصي يا دعاء ، الانسان قادر علي حاجات كتير اوي ما بيعرفش انه قادر عليها إلا لما بتحصل ، ايوه يا دعاء ، ممكن حد يبكينا لحد الفجر و ممكن كمان سنين و نفضل نسامح او منعرفش نكره ، ممكن ناس في حياتنا نتخيل ان احنا منقدرش نعيش من غيرهم بس نكتشف اننا قدرنا ، ربنا زي ما خلقلنا في احيان كتير ظروف صعبة و غير معتادة خلقلنا القدرة علي التأقلم معاها خلقلنا النسيان و انا شايفة ان هو ده معني (فإن مع العسر يسر) انا معاكي ان مفيش حاجة تستاهل بس متنكريش عليكي دموعك او زعلك و توقعي اي حاجة من نفسك لأننا طول ما احنا عايشين حنفضل نكتشف في نفسنا حاجات جديدة
bosy ba2ahana awel mara ashof elblog bta3tek wa elpost deh shadetny awee ..... bas 2a2olek ra2ye besara7a enty konty btehraby men 7aga wa betmeny nafsek bkol elnas ely 7waleky rabena ya5alehomlek bas enty low 3oza 7al .... waghy matehrabesh
a7la 7aga 2aret-ha mn isboo3 :)
begad rapena yeraya7 2albek we yetamenek..
Post a Comment