Saturday, December 09, 2006

انا مش انا ..انا حد تانى خالص

انا خلاص مش عارفه اعمل ايه بجد ها تجنن .. تعبت من هؤلاء البشر الذين يعاملونى على انى شخص اخر غيرى" انا " ..لاء انا ليس هذا الشخص الذى تتخيلونه انا حد تانى خااااااااااالص.. الاغلبيه يعاملونى على انى هذه البنت الهبله الطيبه جدا السطحيه للغايه التى لا تفهم شىء مما يدور فى هذا العالم لايعلمون انى اذا اعلنت عما بداخلى سيصعقواعندما يعلموا ان انا مش انا اللى هما رسموها قى خيالهم سيعلنون الحرب على لانى على النقيض منهم.. بجد اكره قولبتهم لى لكنى لا اشعر برغبه فى الحديث او التعامل معهم اريدهم ان يتركونى فى عالمى لا يقيموننى ولا يطلقوا الاحكام على ،لا اريد ان ادخل فى سفسطه مع مجموعه من الاغبياء يرون انهم فقط من يملكون الحقيقه هؤلاء محدودى الافق الذين يعتقدون بما انك صامت لا تتحدث ولا ترغى يعنى انك سطحى وتافه و صامت ايضاً من الداخل لا يعلمون ان هناك عالم بداخلك ترد على كل كلمه يقولوها لكنك لن تستنزف نفسك فى حديث لن يفيدك وفى النهايه هؤلاء الاغبيه لن يفهموا ما تقول تفضل الصمت وتجعلهم يستمتعون باحساسهم الزائف انهم افهم منك واعلم منك لا يرون الا نظره لا تعطى اى انطباع مع تلك الابتسامه الساخره منهم والتى يعتقدون منها انك مبهور بعبقريتهم .. وتستمتع انت بصمتك وسخريتك منهم ومن سذاجتهم واستمتاعهم الزائف بتفوقهم وتدخر حديثك لمن يستحقون هذا ، لشخص يعلمك جيدا شخص استطاع ان يخترقك ويجلس معك داخل ذاتك وهو فى اغلب الاحوال لن يكون اكثر من شخص واحد او لشخص تعلم انه فيلسوف وحكيم وحديثك ومجادلتك معه ستفيدك وستتعلم منه او شخص تعلم انك بحديثك معه سيتعلم منك يعنى جميعهم مثلك ومن عالمك ستجدهم ايضا يتعالون على اشباه البشر هؤلاء .. سنتجمع ونتحد ونتعلم من بعضنا الاخر بعدها سنكون الاغلبيه ونتخلص من تلك الكائنات الاوليه

15 comments:

elkamhawi said...

اه منا العارف الحوار ده ووجعالى بيه دماغى فى البيت ده حتى اما نضيوف يجو عندنا البيت مش بتكلفى خاطرك وتطلعى من "الصومعة" بتاعتك عشان تسلمى عليهم اقول على الباقى ولا اقولك كفايــه

elkamhawi said...

ايوة منا عارف افكارك الثورية من ساعت ما اخدو مننا الاراضى ووزعوها على عامة الشعب وكنا هنهاجر فرنسا من ساعتها

3rby said...

اول حاجة شكرا علي التنفيض لتعليقي علي البوست اللي فات
ثانيا:اسف بجد ومن قلبي لانك المتيني لما قريت البوست ده لاني ساعات كنت بابصلك كده
تخيلي صفحة في النت تخلينا واحنا قرايب بقالنا اد ايه نفهم بعض في نص دقيقة

ثالثا:انتي خلتيني اخد قرار باني لما حد يتكلم في السياسة قدامي في المدرسة اتخرس خالص
العيال النهارده كانوا بيقولوا مبارك مش حرامي وتامر حسني مش تافه ومايع وانا باحلم

Anonymous said...

جميل اوي يادعاء
انا بقي مشكلتي اني رغاية ماعرفش اقعد دقيقتين علي بعض من غير متكلم

وعبارة عن شمس متحركة يعني كله يعرف عني كل حاجة
ولو حاولت اخبي وافتكرت ان بيني وبين الناس حيطة كبيرةوعالية اوي
اكتشف ان الناس تسلقوها وبيبصوا عليا من فوق
يعني قاعدة طول الوقت بخبي عليهم وهم شايفني وبيضحكوا عليا

بس عادي بقي
انا كدة ومفيش غير كدة عندي
ومش هقدر اكون غير نفسي
اللي عايز يعرف حاجة يعرفها
مش هتفرق

Anonymous said...

جميل اوي يادعاء
انا بقي مشكلتي اني رغاية ماعرفش اقعد دقيقتين علي بعض من غير متكلم

وعبارة عن شمس متحركة يعني كله يعرف عني كل حاجة
ولو حاولت اخبي وافتكرت ان بيني وبين الناس حيطة كبيرةوعالية اوي
اكتشف ان الناس تسلقوها وبيبصوا عليا من فوق
يعني قاعدة طول الوقت بخبي عليهم وهم شايفني وبيضحكوا عليا

بس عادي بقي
انا كدة ومفيش غير كدة عندي
ومش هقدر اكون غير نفسي
اللي عايز يعرف حاجة يعرفها
مش هتفرق

karim said...

انا سعيد لانى اول واحد اعلق على موضوعك
بس الناس اللى شيفين نفسهم عارفين كل حاجه سيبك منهم

Anonymous said...

مساء الفل أنا متأكد ان أنتى مش انتى وهذا الهدوء الذى يبدو للبعض طيبة مفرطة هو الهدوء الذى يجب أن يتعامل معه الناس اللى بتفهم بحرص شديد واحترام أشد لأن صاحبه يرى الجميع من زوايا حقيقية غايبة عنهم وبعدين مفيش حد يعرف كل حاجة هناك جزء غائب ومظلم من الحقيقية .عيشى حياتك وكبرى دماغك كله زايل .نفضى ..فوزى

3rby said...

تعرفي يا دعاء
البوست ده وجعني بجد
والله اثرتي فيا
شوفتي فايدة التكنولوجيا
بعد 16 سنة قرابة قدرت افهمك في دقيقتين
انا بجد ماكنتش اعرفك

دعاء عادل said...

كريم
انا فرحانه برضه انى لاقيت تعليق وعلى العموم تشكر يا مان

فوزى
الحمد لله انى لاقيت حد متأكد
وبالنسبه للتكبير ما فيش اكتر من كده عندى
لكن بالنسبه لحكاية التنفيض دى صعبه شويه
الشقه نضيفه اصلهم لسه منفضنها امبارح

احمد
يااااااااااه يا احمد اخيرا بعد 16 سنه ..وانا طول الفتره دى اقول احمد متغير معايا ليه ؟!
المهم نفتح صفحه جديده
وخلاص بقى عشان قربت اعيط

Anonymous said...

انت بنت ذكيه جدا ,, هى دى الصياعه بجد و هنا ليست الصياعه بالمعنى السئ و انما الصياعه الحقيقيه المحترمه .. و هى تتلخص فى :قولو كما تشاؤون و انا لا ارد و احتفظ برائى لتفسى و اسخر بداخلى حينما تعتقدون انكم الساخرون

geneye.blogspot.com

دعاء عادل said...

جينى
شكرا بجد ليك واعتقد اننا لن نستطيع
التعامل مع هذا العلم الا بتلك الطريقه وفى نفس الوقت نعمل ما نراه صحيحا دون اهدار الكلمات مع من لا يستحقها

أحمد الدريني said...

دودو صاحبة المفاجآت السارة..والمباغتات اللامتوقعة...كوني أنت..فما أروع كونك أنت..
أنا واحد ممن يعلمون ظاهرك وباطنك...
ظاهرك رائع..لإي طيبته وغضاضته ولطافته وانزواءه...
باطنك أروع في جموحه وخفة دمه وذكائه...
لايعنيني أتعامل مع أيهما...
المهم أننا نتعامل معك أنت

دعاء عادل said...

احمد الدرينى انتيم روحى

بص يا حمد انا مش ها شكرك على الكلام ده لان طبيعى ان نفسى تكون عرفانى ..انت يا احمد جزء من ذاتى يسير على الارض ..
وانا بحبنى اوى وانا متأكده ان انا عارفه ده كويس

دبابيس said...

ايه الحلاوةوالجمال ده انا طبعا كل الكلام عجبني جدا بس البوست ده بالذات حبيت اعلق عليه بقى سعادتك شايفة ان الناس شيفاكي سطحية وهبلة وطبعا بيحاولوا بظهرو تفوقهم على ذكائك المحدود وذعلانة من كده هقولك ايه !! شر البلية ما يضحك انتي عارف ان فيه مثلا اكتر من مليون مواطن على الأقل نفسهم يعيشوا الحياة الجميلة بتاعتك والناس تعاملهم كده.. مش هشغلك بأسباب كتير المهم لو انتي شايفة ان دي مشكلة حلها سهل جدا وف اديك ببساطة تحدثي عن نفسك واعلني عن نفسك للعالم الموضوع بسيط ولو انتي شايفه ان العالم من الحمقى ومش هيتواصلوا معاكي يبقى اساسا مش هيعرفوا يقولوا عليكي تافهة وسطحية لأنهم اساسا حمقى !! يعني كام بق جامد هيخلص الموضوع انا , لكن تقريبا من المقالات بتاعتك العملية انك مش عارفة توصلي للسلام الداخلي لأن العالم حواليكي مش ذي ما انتي عاوزاه يعني نفسك الشخص الحكيم اللى يكتشفك ويظهر اجمل اما فيكي .. اطمني ده عمره ما هيحصل ولا هيحصل ويحصل لزوم ايه وبتاع ايه!! يعني سعادتك اللى على دماغك مصباح الحكمة في شارع ضلمة !!!!!!!!!! وهوه هيشوفك لوحده وهيجي عليكي!! صعب شوية اساسا لأن الراجل ده قليل وفرص انكم تتقابلو اقل جربي تعيشي الحياة ببساطة فعلا وعبري عن نفسك ببساطة هتلاقي نفسك في المكان اللى نفسك فيه واذا كان فيه مشكلة في نظرة الناس ليكي فطبعا دي مش مشكلة الحمقى والمغفلين وانما مشكلتك الشخصية ولو سعادتك شايفة نفسك حاجة كبيرة قوي بس مش لاقية نفسك خلاص حاولي تكوني حاجةاكبر واجمل واحسن وكده هيكون من الصعب على كل الناس تجاهل الموقف وهتخدي حقك تالت ومتلت

دعاء عادل said...

دبابيس
اولا خلينى اقوم معاك بواجب الضيافه واقدملك واحد قهوه لان دى اول مره تعلق عندى وشكرا ليك جدا
ثانيا من تعليقك حسيت كده انك متخيلنى متخلفه والناس بتجرى واريا فى الشارع تحدفنى بالطوب وتقول العبيطه اهى
لكن الحقيقه انا مش بالظبط كده
المشكله اللى كانت خنقانى ان ناس كتير بتضطرك ظرف الحياه انك تقابلهم او تتعامل معاهم بشكل سطحى تلاقى الناس دى عماله تقول عليك احكام وهى ما تعرفكش اساسا وده اللى بيخنقنى وانا مش مهتمه اعبرلهم عن نفسى ببساطه زى ما انت بتقول لان اصلا ما يهمنيش انهم يعرفونى ولا عايزه اعرفهم لانى عندى اصدقاء كتيييييير والحمد لله على نفس الموجه ونفس الدرجه من التحليق
وكل اللى عيزاه انهم يسيبونى فى حاااااااالى بس ويبطلوا يقولوا عليا احكام فى المطلق زيك كده بنيت تصورات وحكمت مع انك ما تعرفنيش
وشكرا لتعليقك مره تانيه