Sunday, February 11, 2007



وقفت امامها حادثتها حادثتنى سألتها
مرايتى يا مرايتى
فى حد اجمل منى ؟؟
تقول لى لا ولن يكون
اقول لها طيب نانسى عجرم
تقولى دى تقفيل مستشفيات
اقولها طيب هيفاء تقولى سيلكون
طيب يا مرايتى وابتسم وافرح على كده
تانى يوم اجى اعدى بالصدفه المح حد فى المرايه ارجع اتأكد
اسألها تانى مين دى تقولى انتى
اقولها انا كان شكلى غير كده امبارح
تفضل تعرفنى عليها خلاص اصدق واقول دى انا
اجى اعدى مره تانيه الاقى حد جديد
ينهار مش فايت مين دى تقولى انتى
عارفين ساعات بشوف نفسى حلوه اوى كأنى اميره خارجه من قصه خياليه وساعات بشوفنى وحشه جدا واقول ازاى الناس قادره تبص فى وشى
وعلى كده بقى انا مش قادره اعرف انا شكلى ايه

بجد لحد دلوقتى مش عارفه كل مره اشوفنى فى المرايه الاقى شكل جديد وكل مره اتصور صوره تطلع مختلفه عن الصوره اللى قبلها وبجد ها موت واعرف انا شكلى ايه والناس شيفانى ازاى
مش عارفه انا لوحدى كده ولا كل الناس كده هل كل حد فيكوا عارف شكله ايه ولا برضه ما حدش عارف ؟







9 comments:

ذو النون المصري said...

انا مبصدقش اي انسان يقول ان الشكل مش مهم في التعارف بين الناس لا الشكل مهم و احيانا بيكون هو السبب الوحيد لتعارف اي شله ببعضها
لكن موضوع ان الانسان بيشوف نفسه مره كده و مره كده اعتقد ان اي انسان بيمر بحاله مماثله لان الانسان بطبيعته اجتماعي و بيحب يعرف اكيد رؤية الاخرين له او بيحب يعرف موقعه في نظرهم
لكن ارجع و اقول كما يقول غيري الشكل ليس هو الاهم بل القلب الخ الخ
و طبعا في الاخر نادر جدا مبنلاقي حد بيعمل كده

ذو النون المصري said...

ياريت ان كان عندك معلومات عن اللوحات تكتبيها ببونط صغير جدا تحت اللوحه لانها تعتبر معلومه مهمه
انا اعتقد ان هذه اللوحه لبيكاسو او احد مقلديه

harbia said...

أنا مين ..أنا مين..انا ميييييييييين
حاسس ان جواكي ثقة كبيرة بنفسك وشخصية رافضة تطلع خوفا من انك تكتشفي ان مش هي دي اللي الناس كان متوقعينه ...مجرد إحساس بس الأكيد انك جميلة أوي يا دعاء
مش عارف ايه اللي انا بقوله ده ..بس انت فاهمة قصدي..مش كده؟
احمد حربية

shams said...

الموضوع ده بيحصلي كتير اوي يا دعاء وفعلاً بيجيلي نفس الإحساس بس أنا بفسر الموضوع ده على أساس إحساسي بنفسي ساعتها يعني لو انا مثلاً فرحانة بحس اني أمورة اوي واني تقاطيعي مسمسة كده وقمر لكن لما ابقى زعلانة او متنكد علي او مكتئبة بحس اني وحشششششششششششة مش طايقة ابص في وشي ، متهيألي طول ما احنا بنتغير عمرنا ما هنثبت على شكل واحد

koukawy said...

انا زيّك كده بس مش بتفرق من يوم ليوم 00دي بتفرق بين شويه وشويه
يعني ممكن الصبح يفقرق عن بعد الضهر00
هو تفسيري انها الحاله النفسيه بتطبع علي الوش

بياترتس said...

عارفه انا كل ما أعرف حد لازم فى يوم اسأله هو شايفنى ازاى
كلهم بشفونى فى اول تعارفنا بشكل ولما بنقرب من بعض بيشفونى واحده تانيه خالص
انا كمان بحس كده معهم
اظاهر ان ده مرض فى الذات الانسانيه

Anonymous said...

س.تركي
حالة البارانويا الجميلة دي لازم يبقالها نهاية و لازم تختاري اي شخصية لازم تظهري بيها و للابد.
بس عموما ايهما ستختارين ستكون جميلة!
http://ymeenshemal.blogspot.com

Anonymous said...

بس اختيار الصور عالي قوي
تقريبا ده بيكاسو و الله اعلم

دعاء عادل said...

ذو النون المصرى
انا اعتقد برضه ان اللوحه لبيكاسو
بس الحقيقه مش عارفه انا ببحث فى جوجل صور وبحثت تانى ما لقتش حاجه مكتوبه عن الصوره

حربيه
انت سألتنى السؤال ده وحاولت اهرب من الاجابه مش عارفه ليه يمكن يمكن لانى مش عارفه الاجابه او يمكن عشان عرفاها
واكيد كده
واكيد انت فاهمنى برضه

شمس
بس ياريت يا شمس برضه الواحد يعرف شكله الوحش ده ايه او شكله الامور ده ايه لانه برضه مش بيثبت على شىء واحد
مش عارفه ايه ده بالظبط يا شمس شكلنا اتجننا ولا ايه
:)

koukawy
نورتى البلوج لانك اول مره تزورينا
اهلا بيكى كتير
وواللهى انا ما بقتش فاهمه ايه سبب اى حاجه اليومين دول

بيتاترس
تصدقى فعلا الاناس شكله بتغير يعنى اول ما تتعرفى على حد بتشوفيه بشكل وبعد فتره بتشوفيه بشكل تانى يعنى مش الواحد بس اللى مش عارف شكله ايه ده كمان ملامح الناس مش عارفها
نورتى البلوج

سيد ترك
واللهى يا سيد مش عارفه النهايه هاتكون ايه بالظبط
وربنا يخليك انت اللى شخص جميل
ومبروووووووووووووك على البلوج انا واثقه انك واحمد حربيه هاتعملوا بلوج ما حصلش وكمان جديد


وبجد مش عارفه الصوره لمين بس هى خطوط بيكاسوا تقريبا